اسلام آباد(تھلوچی نیوز)پاکستان پیپلز پارٹی کے صوبہ خیبر پختونخوا کے گورنر فیصل کریم کنڈی کی زیرِ صدارت، نیشنل پریس کلب اسلام آباد میں سندھ کلچر ڈے کے حوالے سے ایک شاندار میوزیکل نائٹ کا اہتمام کیا گیا۔ اس تقریب میں ثقافتی شخصیات، فنکاروں اور سیاسی رہنماؤں نے شرکت کی۔ مہمانِ خصوصی فیصل کریم کنڈی نے اس موقع پر اپنے خطاب میں کہا کہ سیاست اور صحافت ایک دوسرے کے ساتھ جڑے ہوئے ہیں اور این پی سی ہر اہم موقع پر اپنے ممبران کی فلاح و بہبود اور تفریح کے لیے اس طرح کے ایونٹس کا انعقاد کرتا رہتا ہے۔تقریب میں سندھ کے مشہور لوک فنکار منصور علی عباسی، ریشماں پروین اور رضوانہ خان نے اپنے دلکش گیتوں کے ذریعے محفل کو گرمایا اور حاضرین کو محظوظ کیا۔ فیصل کریم کنڈی نے سندھ کلچر کے فروغ کے لیے کہا کہ سندھ کلچر نائٹ کا انعقاد پورے ملک میں ہونا چاہیے، اور انہوں نے سندھ کلچر ڈیپارٹمنٹ کے اسلام آباد میں موجود نمائندوں کو خیبر پختونخوا میں بھی ایسی تقریبات کے انعقاد کی دعوت دی۔پی ایف یو جے کے صدر، افضل بٹ نے این پی سی کی گورننگ باڈی کو مبارکباد دی کہ انہوں نے اتنی کامیاب تقریب کا انعقاد کیا۔ اس موقع پر این پی سی کے نائب صدر اور کلچرل کمیٹی کے چیئرمین شاہ محمد کا اہم کردار اجاگر کیا گیا۔ صدر این پی سی، اظہر جتوئی نے بھی این پی سی کے ثقافتی ایونٹس کے انعقاد کو سراہا اور کہا کہ یہ ایونٹس ممبران کے لیے تفریح اور ہم آہنگی کا موقع فراہم کرتے ہیں۔تقریب میں گورنر کے پی فیصل کریم کنڈی کی سالگرہ کا کیک بھی کاٹا گیا، اور شرکاء کو سندھی اجرک اور ٹوپیاں تحفے کے طور پر دی گئیں۔ اس موقع پر این پی سی کے دیگر ارکان، بشمول شاہ محمد، طارق علی ورک، نذیر چراں اور دیگر نے بھی خطاب کیا۔ایسی تقریبات نہ صرف مختلف ثقافتوں کے مابین ہم آہنگی بڑھاتی ہیں بلکہ ہمارے روایتی کلچر کو زندہ رکھنے میں اہم کردار ادا کرتی ہیں۔