ڈولفن سکواڈ میں کروڑوں روپے کی کرپشن کا سکینڈل منظرِ عام پر آ گیا ہے۔ انکوائری کمیٹی نے اپنی رپورٹ مکمل کر لی ہے، جس میں ایس پی ڈولفن سمیت 10 افسران اور اہلکاروں کو کرپشن میں ملوث پایا گیا ہے۔ڈی آئی جی آپریشنز نے ڈولفن سکواڈ کے 10 اہلکاروں کو نوکری سے برخاست کر دیا ہے، جن میں سب انسپکٹر ناصر خان، اے ایس آئی شاہد، سخاوت کانسٹیبل، حمزہ، امانت، نقاش اور عرفان شامل ہیں۔ ان اہلکاروں کے خلاف کرپشن کی تحقیقات کی گئیں اور انہیں ملازمت سے فارغ کر دیا گیا ہے۔انکوائری رپورٹ میں بتایا گیا کہ ڈولفن سکواڈ کی موٹر سائیکلوں اور گاڑیوں کی مرمت کے لیے 20 کروڑ روپے کے فنڈز جاری کیے گئے تھے، جن میں سے 8 کروڑ روپے کی کرپشن کی گئی۔ پروکیورمنٹ اور ایم ٹی افسران نے ملی بھگت سے اس کرپشن میں حصہ لیا۔ رپورٹ میں مزید کہا گیا کہ افسران نے پیپرا رولز کی خلاف ورزی کرتے ہوئے ناقص پرزہ جات خریدے، جس سے عوامی فنڈز کا ضیاع ہوا اور بدعنوانی کو فروغ ملا۔انکوائری کمیٹی نے ایس پی ڈولفن زوہیب کے خلاف بھی رپورٹ آئی جی پنجاب کو ارسال کر دی ہے، جس میں ان کی غفلت اور کرپشن میں ملوث ہونے کی نشاندہی کی گئی ہے۔ اس کارروائی کے بعد مزید انکوائریز اور قانونی اقدامات کی توقع کی جا رہی ہے۔