یونان میں پیش آنے والے کشتی حادثے میں جاں بحق ہونے والے مزید 4 پاکستانیوں کی لاشیں برآمد کر لی گئی ہیں، جس کے بعد کشتی حادثے میں جاں بحق پاکستانیوں کی تعداد 9 ہو گئی ہے۔ایف آئی اے کے مطابق تین لاشوں کی شناخت نارووال کے شبیر، زین علی اور ذیشان کے ناموں سے ہوئی ہے، جبکہ ایک لاش کی شناخت سیالکوٹ کے اویس علی کے نام سے کی گئی ہے۔ یہ لاشیں یونان کے جزیرے گیواڈوس سے ایتھنز کے اسپتال منتقل کی گئی ہیں، جہاں پاکستانی سفارت خانہ ان لاشوں کو پاکستان بھیجنے کے لیے انتظامات کر رہا ہے۔ایف آئی اے نے بتایا کہ یہ لاشیں پاکستان بھیجنے میں مزید ایک ہفتہ لگ سکتا ہے۔ حادثے میں اب بھی 40 پاکستانیوں کی لاشیں لاپتہ ہیں۔ یہ سانحہ 13 اور 14 دسمبر کی درمیانی شب پیش آیا، جب کشتی لیبیا کے علاقے تبروک سے یونان جا رہی تھی اور حادثے کا شکار ہوگئی تھی، جس کے نتیجے میں 44 پاکستانیوں کو ریسکیو کیا گیا تھا۔