آگ جو دل میں لگی ہے وہ بجھانی تو نہیں
داستاں عشق کی رو رو کے سنانی تو نہیں

آج ہنس ہنس کے جو ملتے ہو خلاف عادت
یہ بچھڑنے کی کہیں تیری نشانی تو نہیں

کون رُسوا ہو سرِ عام، یہ اب سوچ لیا
دل میں جو بات بھی ہو ، لب پہ وہ لانی تو نہیں

جس نے برباد کیا اپنے وطن کو لوگو!
دشمنِ جاں ہی اُسے جانو وہ جانی تو نہیں

دوستو پیار کرو، شیوہ نفرت چھوڑو
فرصت زیست کبھی کوٹ کے آنی تو نہیں

دنیا والوں کو مری یاد رہے گی برسوں
میں حقیقت ہوں کوئی بھولی کہانی تو نہیں

زینت دار و رسن پھر کوئی منصور ہوا
رسم بے باک یہ زندہ ہے، پرانی تو نہیں

ناصحا! سوچ لے جل جائے نہ خبث باطن
دیکھ یہ آتش سیّال ہے، پانی تو نہیں

اب کہاں جوشِ جنوں، ذوق تمنا راہی
سچ ہے پہلی سی وہ اب اپنی جوانی تو نہیں