ہوا ایں زور دی ہئ دید والیں دید نئیں کیتی
اساں روزے غزل دے رکھ کرائیں عید نئیں کیتی

فقط ایں جرم وچ لفظیں دے تاجر بغض رکھدے ہِن
ادب دے افلاطونیں دی کوئ تقلید نئیں کیتی

اساں ہک عہد کیتا ہا اساں ہک عید کیتی ہئ
ولا کوئ عہد نئیں کیتا ولا کوئ عید نئیں کیتی

سرو پکھی دے کھمب وانگوں تیڈی وسوں توں اڈریے ہیں
تیڈے شہر اِچ ہزاراں ارتھ ہن امید نئیں کیتی

جے آہدا تاں میں بیٹھا رہ ونجاں ہا اوندے رستے تیں
میں ول آساں اوں ویندی وار اے تاکید نئیں کیتی

گوانڈھیں نال ملدا ہے الیندا ہے تیں کھلدا ہے
اساڈو دید اج تونڑیں ولا بےدید نئیں کیتی

چِھبِھیندا تہمتیں دی بارشیں وچ رہ گیا شفقت
تیڈے شہر اِچ میڈے سچ دی کہیں تائید نئیں کیتی