سجنڑ پاتیاں جو ہِن کجھ دیر ونگاں
غزل وچ چھنڑکدن چوپھیر ونگاں

نہ رو چنڑ چنڑ کرائیں ونگیں دے ٹوٹے
تیڈی, وینڑی سلامت ڈھیر ونگاں

میکوں دھرتی دی دھرتی ونگ نظرے
توں ایں دھرتی تیں اِتلاں کیر ونگاں

جے پھر سگدیں وفا دے پھیر تیں آ
ایویں منہ پھیر تے نہ پھیر ونگاں

پلوتے ہِن زمانے دیاں نگاہیں
دعائیں ہِن تیڈے ہتھ پیر ونگاں

سًہیندے کون اتلی دیر سیجھاں
ہنڈیندے کون اتلی دیر ونگاں

تھیا اے زلف دے ہک وار جوگا
گیاں بزدار کوں وت گھیر ونگاں