ساڈے پاسے ہے ڈکھ دا ُڈوا حال ڈے
اپنڑے پاسے دا توں کوئی بھراء حال ڈے

کیویں آدم توں تھئی ہئی خطا دا ڈسا .
میکوں ُمنڈھ کولوں سارا ولا حال ڈے

کوئی دمانی ہے شجرہ پُھلیندا جیویں
جلدی جلدی نہ قصہ مکا حال ڈے

حال ڈیساں جو ساڈا تاں کوئی حال ناہ
پچھیا محشر دے ڈینہہ جو خدا حال ڈے

جیڑھا سنڑدے او ہک ڈینہہ الا پوندا ہے
تہوں تاں کندھلی کوں آکھم الا حال ڈے

تیڈے متھے دے محراب دا کیا بنڑیا
تائیں جو بھیجی ہئی اتے دعا حال ڈے

ساڈے پاسے تاں منشو دا ناں وجدا پئے
تیڈے پاسے ہے کیندی ہوا حال ڈے