وزیراعظم شہباز شریف کا کہنا ہے کہ ہر قسم کی دہشت گردی کو جڑ سے اکھاڑ پھینکنے کیلئے پرعزم ہیں۔
وزیراعظم شہباز شریف فیصل آباد میں لیفٹیننٹ کرنل محمد علی شہید کے گھر پہنچے، جہاں انہوں نے شہید کے اہلخانہ سے تعزیت کرتے ہوئے لیفٹیننٹ کرنل محمد علی کیلئے فاتحہ خوانی بھی کی۔
اس موقع پر شہباز شریف نے کہا کہ دہشتگردی کے خلاف جنگ میں قوم پاک فوج کے شانہ بشانہ کھڑی ہے، ملکی سلامتی کیلئے افواج کی قربانیوں کو فراموش نہیں کیا جا سکتا۔شہباز شریف نے کہا کہ پاک فوج کے شہداء اُن سمیت پوری قوم کا فخر ہیں، پاکستانی قوم اپنے شہداء اور ان کےاہل خانہ کی ہمیشہ مقروض رہے گی۔
انہوں نے کہا کہ سیکیورٹی فورسز نے دہشت گردوں کے خلاف کامیاب کارروائیاں کی ہیں۔
خیال رہے کہ لیفٹیننٹ کرنل محمد علی شوکت 4 اور 5 اکتوبر کی درمیانی شب شمالی وزیرستان میں خوارج کیخلاف آپریشن میں 5 جوانوں سمیت شہید ہوئے تھے۔
اس کارروائی میں لانس نائیک محمد اللّٰہ، لانس نائیک اختر زمان، لانس نائیک شاہد اللّٰہ،لانس نائیک یوسف علی اور سپاہی جمیل احمد نے بھی جام شہادت نوش کیا