اگر ماضی کے حوالے سے سماجی اختلاط، ربط ضبط اور دیہاتوں سے شہروں کی طرف ہجرت کے معاملے پر غور کریں محسوس ہوتا ہے کہ یہ کوئی نیاتصور نہیں ہے بلکہ پرانی بات ہے مگر اس میں شدت اور تیزی جدید سائنسی ایجادات نے پیدا کی،مراد ریل کی آمد اور انگریزی حکومت کی طرف سے قائم کردہ اداروں میں ملازمت کے مواقع ہیں جن کی وجہ سے دیہاتوں کے لوگ شہروں کی طرف آئے یعنی ہجرت کا یہ عمل انیسویں صدی سے ہی شروع ہوچکا تھا۔لہذا ہم دیکھتے ہیں کہ اردو شعروادب کی تخلیق کے حوالے سے اہم تر(بلکہ اہم ترین)لوگوں کا تعلق اردو کے روایتی مراکز سے نہیں بلکہ ان کا تعلق مضافات اور دیہات سے ہے۔ ان میں سے بہت سے تخلیق کاروں کے ہاں وہ محاوراتی اور روایتی زبان بھی مستعمل نہیں،جو دلی اور لکھنو کی تہذیب کی شناخت سمجھی جاتی ہے مگر اس کے باوجود ان کی زبان دانی اور ان کی تخلیقات کو اردو کے ادب عالیہ میں شمارکیا جاتا ہے۔ مثلاً اقبال اور حالی۔

  بیسویں صدی کے ادب پر نظر دوڑائیں تو ایک لمبی فہرست موجود ہے۔ ان میں منیر نیازی کا تعلق ہوشیار پور سے تھا، ظفر علی خان کا تعلق کرم آباد(وزیرآباد) سے، مختار صدیقی کا تعلق گوجرانوالہ سے، مجید امجد کا تعلق جھنگ سے، عبداللہ نیاز کا تعلق لیہ سے، ن، م، راشد کا تعلق گوجرانوالہ سے، احمد ندیم قاسمی کا تعلق خوشاب سے، سید ضمیر جعفری کا تعلق چک عبدالحق ضلع جہلم سے، شیرافضل جعفری کا تعلق جھنگ سے،محسن نقوی کا تعلق ڈیرہ غازیخان سے، فتح محمد ملک کا تعلق جہلم کے دیہات سے، منشایاد کا تعلق شیخوپورہ کے دیہات سے، ظفر اقبال کا تعلق اوکاڑہ سے، شکیب جلالی کا تعلق بھکر سے، فرازؔ کا تعلق خیبر پختونخواہ کے دیہات سے، اشفاق احمد کا تعلق ریاست پٹیالہ کے دیہات سے، آفتاب اقبال شمیم کا تعلق جہلم سے، نسیم لیہ کا تعلق لیہ سے، خیال امروہوہی کا قصہ سب سے نرالا ہے، پیدائش اورلڑکپن امروہہ میں گزرا، بعدازاں کراچی میں رہے،جوانی لاہور میں گزاری، کچھ عرصہ شکر گڑھ میں گزرا، کچھ عرصہ ملتان میں،جوانی میں ہی لیہ میں آکر رہے اور لیہ کے ہی ہورہے۔ادا جعفری بدایوں (یو۔پی) سے ہجرت کر کے کراچی آئیں،کشور ناہید بلند شہر سے ہجرت کر کے آئیں،(ادھر ہندوستان میں بھی صورت حال کچھ ایسی ہی ہے۔ گیان چند جین کا تعلق دیہات سے ہے۔احمد یوسف (افسانہ نگار)پٹنہ کے رہنے والے ہیں (بحوالہ سہ ماہی روشنائی کراچی ادارت: زین الدین جنوری تامارچ ص197)ظہیر غازی پوری کا تعلق غازی پورسے ہے۔ بعد میں ہزاری باغ جھاڑ کھنڈ میں مقیم رہے (بحوالہ سہ ماہی روشنائی کراچی اکتوبر، دسمبر2003؁ ص 138)سید اقبال عظیم(وقار عظیم کے چھوٹے بھائی ہیں،شاعر ہیں) قصبہ انبہٹہ ضلع سہارن پور سے تعلق رکھتے ہیں (بحوالہ سہ ماہی روشنائی جولائی، ستمبر2007؁ ص،144)،محبوب خزاں موضع چندائرضلع بلیا(یو۔پی سے تعلق رکھتے ہیں۔)تخلیق کاروں کی یہ فہرست بہت طویل ہے مگر مذکورہ بالا نام اور اردو شعروادب کے حوالے سے ان کاکام دیکھ کریہ اندازہ لگانا مشکل نہیں کہ اردو شعروادب کو شہری اور مضافاتی زمروں میں تقسیم کرنا ایک سعی لاحاصل کے سوا کچھ نہیں۔

جب ہم جدید دور کے شعروادب کے موضوعات کا جائزہ لیتے ہیں تو حیران کن نتائج سامنے آتے ہیں۔ مضافات/دیہات اور علاقائی ثقافتی زمروں سے نکل کر شہروں میں آبسنے والے سبھی شاعروں اور ادیبوں نے اپنی تہذیبی اور ثقافتی شناخت اور اپنے علاقے کے ثقافتی موضوعات کو اردو میں سمونے کی بھرپور کوششیں کی ہیں۔ ان میں وہ لوگ بھی ہیں جو بڑے مراکز میں پلے بڑھے ہیں مگر موضوعات علاقائی تہذیب وثقافت سے اخذ کرتے ہیں مثلاً ”جانگلوس“کا پورا منظر نامہ، شوکت صدیقی نے کراچی میں بیٹھ کر پنجاب اور جنوبی پنجاب کے جاگیردارانہ تہذیب کے پس منظر میں تخلیق کیا۔احمد فراز نے اردو غزل کے روایت کو بے حد ملحوظ رکھا مگر نظم”لختئی“خالصتاً پشتو تہذیب وثقافت کے پس منظر میں لکھی گئی۔ساقی فاروقی نے نظم”الکبڑے“لکھی۔مجیدامجد کی بیشتر شاعری اور نظمیں پنجاب کی مٹی کی خوشبو سے مہکتی ہیں۔پریم چند کے افسانوں کی فضا اور موضوعات میں ہندوستان بھر کا دیہات سانس لیتا ہے۔کرشن چندر کے ہاں دیہی کلچر کی پیش کش موجودہے۔احمد ندیم قاسمی کے افسانوں میں دیہاتی تہذیب وثقافت کے رنگ بکھرے ہوئے ہیں۔اشفاق احمد کا اہم ترین افسانہ ”گڈریا“دیہی کلچر اور دیہی ثقافتوں کے مظاہر سے مملو ہے۔ وزیرآغاکے ہاں دیہی ثقافتی عناصر موجود رہے۔

ٍ اردو شعروادب کے مطالعے سے یہ بات محسوس ہوتی ہے کہ عمومی طور پر دیہی ثقافتوں کے پس منظر میں مختلف فن پارے تخلیق پاتے ہیں تو ان کا موضوعاتی حسن اور رچاؤ دو چند ہوجاتا ہے۔ اس کی وجہ یہ ہے کہ پاکستان کے دیہات میں ترقی کی رفتار بہت سست ہے،جس کی وجہ سے زندگی کی رفتار بھی سست ہے اور انسانی جذبوں اور محبتوں کوآج بھی ایک خاص انداز سے دیکھا اور محسوس کیا جاتا ہے۔ جبکہ شہروں میں (ہر چند کہ یورپ جیسی سائنسی اور صنعتی ترقی یہاں پر نہیں ہوئی)ایک حدتک زندگی کی رفتار تیز ہے (اور جیسا کہ پچھلے صفحات میں ذکر ہوا شہروں میں موجود لوگ مختلف سماجی اور ثقافتی زمروں سے آئے ہیں)فرد سے فرد کا رشتہ کمزور ہوتامحسوس ہونا شروع ہوچکا ہے۔ لہذا تخلیق کاروں کے ہاں احساس بیگانگی،اپنوں سے دوری کا کرب اور ماضی کے حوالے سے ناسٹلجیاپیدا ہونے لگا ہے۔ پھر دیہات سے آمدہ ان تخلیق کاروں کو خود اپنی شناخت کا مسئلہ بھی گھیرے رہتا ہے۔ اسی وجہ سے دیہات کے پس منظرمیں تخلیق ہونے والے ادب میں مضامین وموضوع کی ندرت بھی ہوتی ہے اور ان کاکینوس بھی وسیع ہوتا ہے۔

دوسری سطح پر زبان اور زبان کے قواعد کا مسئلہ ہے اور ساتھ ہی لفظ اور لفظ کے تلفظ کا مسئلہ بھی۔پاکستان میں اردوزبان کے علمبرداروں کا رویہ فطری لسانی نظریات کے برعکس ہے۔ دنیا بھر میں سمجھاجاتا ہے کہ زبان اور زبان کی اصل دیہات میں ملتی ہے۔ مقامی ثقافتی رویے زبان کے تشکیلی عناصر میں بہت اہم کردار ادا کرتے ہیں پھر جب زبان شہروں کا رُخ کرتی ہے تودیگر زبانوں سے اختلاط بھی ہوتا ہے اور لہجے میں ایک گداختگی بھی پیدا ہوتی ہے مگر اردو کے معاملے میں بڑے تہذیبی مراکز سے دیہات کی طرف الٹاسفر ہے۔ اس زبان کو درباروں سے متعلق سمجھا گیا۔ اس کی لفظیات اور لب ولہجے کا تعلق نوابوں اور محلوں کی تہذیب سے جوڑا گیا۔نتیجتاً مفرس ومعرب قسم کی، کوثر وتسنیم میں دھلی دھلائی زبان کو زیادہ فصیح ماناگیااور ایسی زبان جس میں دیہی،علاقائی ثقافتی عناصر کو شامل کیا گیا،ایک عرصے تک طنز کا نشانہ بنتی رہی ہے۔ اردو خواندہ حلقوں اور اُردو کے تخلیق کاروں نے علاقائی ثقافت اور روایت اور ساتھ ہی علاقائی زبانوں کے الفاظ کو اردو سے دور رکھنے کی شعوری کوششیں کیں اوراس قسم کے اختلاط کو محض تفنن طبع اور مزاح کے لیے استعمال کیا۔ ایسے میں ان فلموں اور ڈراموں نے بھی اپنا کردار ادا کیا جن میں مزاحیہ ادا کار پنجابی یا پشتو، سرائیکی یاسندھی آمیز اُردو، مقامی لہجوں میں بولتا اور مقامی تہذیبی ثقافتی رویوں کو تضحیک کا نشانہ بناتا رہا ہے (اُردو ٹیلی ڈراموں میں یہ رویہ اب بھی موجود ہے۔)

اس ساری بحث کو ملحوظ رکھیں تو یہ بات واضح طور پر ہمارے سامنے آتی ہے کہ آج اُردو زبان کی بقاء مقامی ثقافتی رویوں اور مقامی زبانوں کے الفاظ کو اُردو میں سمونے میں مضمرہے،اس کی شروعات ایک حدتک ہوچکی ہیں مگر عمومی طور پر اُردو کے نقاد اور تخلیق کار اس عمل سے گریزاں رہتے ہیں۔ اس سارے منظر نامے کو پیش نظر رکھیں تویہ نتیجہ اخذ کرنا مشکل نہیں کہ اردو میں مضافاتی ادب کی اصطلاح یا اصطلاحی معنوں میں ایسے ادب کی کوئی صورت موجود نہیں۔ شہروں اور دیہاتوں کے رہنے والے تخلیق کاروں نے اردوشعروادب میں جو اضافے کیے ہیں،وہ اپنی مثال آپ ہیں۔ اردو کے لسانی ڈھانچے اور نئی لفظیات کے حوالے سے ہمیں کچھ نئے فیصلے کرنے ہیں۔ جتنی جلد ہم حقائق کو تسلیم کرکے نئے فیصلے کرلیں گے اردو کا مستقبل اتناہی محفوظ ہوجائیگا۔

ان تمام مباحث کو ملحوظ خاطر رکھتے ہوئے جب ہم چھوٹے شہروں اور قصبوں میں ترویج زبان و ادب پر نظر کرتے ہیں تو حیرت زا نتائج سامنے آتے ہیں۔ اگلے صفحات میں ہم اس حوالے سے لیہ کے مجموعی شعروادب پر نظر ڈالنے کی کوشش کریں گے۔