ادب دراصل معاشرے کا آئینہ ہوتا ہے۔تخلیق کار جو ادب تخلیق کر رہا ہوتا ہے وہ دراصل معاشرے کے وہ پہلو ہوتے ہیں جسے معاشرہ عام طور پر نظر انداز کرچکا ہوتا ہے۔ادب دراصل زندگی کی وہ علامت ہے جس کے دم سے زندگی چل رہی ہوتی ہے۔کسی بھی معاشرے کی سوچ کا انداز وہاں کے تخلیق کردہ ادب سے لگایا جا سکتا ہے۔

  سوچ اور اظہار کا عمل ہی تخلیق کا عمل ہوتا ہے۔مگر ایک ایسے علاقہ میں جہاں زندگی ابھی پوری طرح انگڑائی بھی نہ لے سکی ہو وہاں کیسے سوچ اور اظہار کا عمل پیدا ہو سکتا ہے۔اس بارے ڈاکٹر افتخار بیگ لکھتے ہیں کہ

”ایک دور میں لیہ محض ایک چھوٹا سا قصبہ تھا۔ذرائع آمدو رفت اور مواصلات کا فقدان تھا۔یہاں کے لوگوں کا دور دراز کے شہروں سے رابطہ ایک مشکل عمل تھا۔مگر اس دور کے تخلیق کاروں کے ہاں عصری تقاضوں کے حوالے سے ایک شعور موجود ہے۔پاکستانی معاشرے میں جو فکری و نظری مباحث موجود رہے ہیں،ان کے اثرات اس دور دراز  خطے کے تخلیق کاروں کے ہاں بھی پوری شدت اور گہرائی کے ساتھ موجود رہے ہیں اور یہاں کے شعرا نے بھی ہر اس بات اور صورت حال کو محسوس کیا ہے جو ہمارے معروض کا حصہ رہی ہے۔“

ٍٍ لیہ بڑے ادبی مراکزسے دوراور”مضافاتی شعرو ادب“کے بہت قریب تھا۔مضافاتی ادب سے مراد عام طور پر شہروں سے دور تخلیق ہونے والے ادب کو کہا جاتا ہے۔مضافاتی ادب میں جو ادب تخلیق ہوتا ہے وہ یقینا فطرت میں گندھا ہوا ہوتا ہے۔اور یہاں کے ادبا کسی بھی ظاہری نمائش کے طالب نہیں ہونے ہوتے مگر یہاں کے ادبا بڑے ادبی مراکز کے خلاف بڑی شدو مد سے پُر احتجاج دیکھائی دیتے ہیں اور اپنے بارے کہتے ہیں بقول شاعر

نور سے دور سیہ رات میں زندہ رہنا

کتنا مشکل ہے مضافات میں زندہ رہنا

”مضافاتی شعرو ادب“میں ایک شاعر ایسا بھی ہے جسے اپنے علاقہ،وطن سے بے پناہ محبت ہے وہ ہے افضل صفی۔ افضل صفی اس معاملے میں عجیب ہے وہ مضافات میں رہنا پسند کرتا ہے کیوں کہ وہ اپنے خمیر سے بے پناہ محبت کرتا دکھائی دیتا ہے۔افضل صفی نے کھل کر اپنے علاقہ سے محبت کا اظہار کیا ہے۔ایک قطعہ دیکھئے کہ

مبارک ہو تمہیں لاہور کی رنگین گل کاری

ہمیں ”لیہ“ ہی جچتا ہے، ہمیں اس سے محبت ہے

مبار ک ہو تمہیں اس شہر کی ہر ایک رعنائی

رفیق اپنا تو صحرا ہے،ہمیں اس سے محبت ہے

اس میں کوئی شک و شبہ کی بات نہیں کہ مضافاتی ادب نے ادب کو بے پناہ سرمایہ دیا ہے اور حقیقتاً یہ ہی سرمایہ ادب کے ماتھے کا جھومر ہے۔ڈاکٹر افتخار بیگ لکھتے ہیں کہ

”مضافاتی ادب پر نظر دوڑائیں تو ایک لمبی فہرست موجود ہے۔ ان میں منیر نیازی کا تعلق ہوشیار پور سے تھا، ظفر علی خان کا تعلق کرم آباد(وزیرآباد) سے، مختار صدیقی کا تعلق گوجرانوالہ سے، مجید امجد کا تعلق جھنگ سے، عبداللہ نیاز کا تعلق لیہ سے، ن، م، راشد کا تعلق گوجرانوالہ سے، احمد ندیم قاسمی کا تعلق خوشاب سے، سید ضمیر جعفری کا تعلق چک عبدالحق ضلع جہلم سے، شیرافضل جعفری کا تعلق جھنگ سے،محسن نقوی کا تعلق ڈیرہ غازیخان سے، فتح محمد ملک کا تعلق جہلم کے دیہات سے، منشایاد کا تعلق شیخوپورہ کے دیہات سے، ظفر اقبال کا تعلق اوکاڑہ سے، شکیب جلالی کا تعلق بھکر سے، فرازؔ کا تعلق خیبر پختونخواہ کے دیہات سے، اشفاق احمد کا تعلق ریاست پٹیالہ کے دیہات سے، آفتاب اقبال شمیم کا تعلق جہلم سے، نسیم لیہ کا تعلق لیہ سے، خیال امروہوہی کا قصہ سب سے نرالا ہے، پیدائش اورلڑکپن امروہہ میں گزرا، بعدازاں کراچی میں رہے،جوانی لاہور میں گزاری، کچھ عرصہ شکر گڑھ میں گزرا، کچھ عرصہ ملتان میں،جوانی میں ہی لیہ میں آکر رہے اور لیہ کے ہی ہورہے۔“

لیہ میں اردو ادب کا آغاز بیسویں صدی کے ربع اول میں ہو تا ہے جب مقصدیت پسندی کی تحریک اپنے بام عروج پر پہنچ چکی ہوتی ہے۔مگر یہاں جو ادب تخلیق ہو رہا تھا وہ گل ورخسار اور حسن و عشق کی زنجیر پہنے ہوئے تھا اس لیے اس وقت ادب سے وہ کام نہ لیا جا سکا جو اس وقت لینا چاہیے تھا۔اس لیے سرسید احمد خان کی مقصدیت کی تحریک اس قدر بارآور ثابت نہ ہوسکی جس طرح ہونا چاہیے تھا ڈاکٹر افتخار بیگ لکھتے ہیں کہ

”بیسویں صدی کے آغاز سے ہی برصغیر کے تقریباًسبھی علاقوں میں بسنے والے مسلمانوں کے ہاں فکری و نظری سطح پر آزادی کا شعور اجاگر ہونا شروع ہوا۔اس فکری تحریک کے پس منظر میں سر سید احمد خان اور ان کے ساتھیوں کی طرف سے کی جانے والی کوششوں کو نظر انداز کیا جانا ممکن نہیں۔سر سید احمد خان کے ”تہذیب الاخلاق“نے فکر و نظر کی نئی جوت جگائی۔ادھر حالی کی شاعری خصوصاً ”مسدس“ نے مسلمانوں کو ایک نئی راہ سجھائی۔پھر ڈپٹی نذیر احمد کے ناولوں نے برصغیر کے مسلمانوں کے اندر فکری طور پر ہلچل پیدا کی تو ادھر عبدالحلیم شرر کے تاریخی ناولوں نے مسلمانوں کو جھنجھوڑا۔یوں فکر و نظر کا ایک ایسا ہیولا تیار ہوا جس نے برصغیر کے مسلمانوں کے سامنے مستقبل کا ایک موہوم سے نقش اجاگر کردیا۔علامہ اقبال کی شاعری نے اسلامیان ہند کو ایک نئی روح سے آشنا کرایا، تو ساتھ ہی لاہور سے چھپنے والے اخبار”زمیندار“ اور زمیندار کے ایڈیٹر ظفر علی خان نے مسلمانانِ ہند کو فکری حوالے سے بیدار کیا۔لیہ اس دور میں ایک چھوٹا سا قصبہ تھا۔ادھر شمال میں کروڑ لعل عیسن قدیم تاریخی حوالے کے ساتھ موجود تھا اور جنوب میں کوٹ سلطان قدیم تہذیبی آثار کے ساتھ موجود تھا۔یہاں کے باسیوں نے اس دور میں اپنا ملی اورفکری فریضہ نبھانے اور جدید فکری رجحانات کو سمجھنے میں زیادہ دیر نہیں لگائی۔ نتیجتاً اردو شعر و ادب کی ایک روایت یہاں بھی پنپنی شروع ہوئی۔لیہ میں پہلا ہائی سکول1920ء کے لگ بھگ قائم ہوا۔جس نے تعلیم وتربیت کی ضرورتیں بھی پوری کیں اور علمی اور فکری ارتقاء کو بھی مہمیز کیا۔اس سارے پس منظر کو ملحوظ رکھتے ہوئے ضلع لیہ کے ان شعرا کا اجمالی تذکرہ کیا جا رہا ہے۔جنھوں نے اپنے خون ِ جگر سے اردو شاعری کی آبیاری کی۔“

یہاں زیادہ تر آباد کار سرائیکی بولتے تھے جسے ابتدا ء میں ملتانی زبان بھی کہا جاتا رہا۔یہاں کے زیادہ تر ادبا سرائیکی کو ہی اظہار کا ذریعہ بناتے تھے مگر یہاں آباد ہندو جو تھوڑی بہت ہندی اور اردو جانتے تھے وہ کبھی کبھار ایک آدھ شعر اردو میں کہہ لیا کرتے تھے۔اس بارے میں پروفیسر کرامت کاظمی لکھتے ہیں کہ

”بیسویں صدی کے آغاز ہی سے سرائیکی شعروادب کا شانہ بشانہ اردو شاعری بھی نظرآتی ہے اگر چہ اس سے پہلے بھی اردو کلام ملتا ہے لیکن شعرائے سرائیکی محض زبان کا چسکا بدلنے کے لیے کبھی کبھار اردو میں عباعی،مسدس یا نظم وغیرہ لکھ لیتے تھے۔زیادہ توجہ سرائیکی پرمرکوز رہی مگر بیسویں صدی کے آغاز ہی سے اردو شاعری پرخصوصی توجہ دی گئی۔اس حوالے سے ہمیں مسلم شعراء کے ساتھ ساتھ چند ہندو شعراء کے نام بھی ملتے ہیں جن میں لالہ تیح بھان اثر،سندر ناتھ جیت اور اشور ناتھ پنڈت خاص طور پر قابل ذکر ہیں۔لالہ تیح بھان اثر ڈھینگڑاں قوم کے چشم و چراغ تھے وکالت کا امتحان پاس کیا مگر باقاعدہ وکالت پیشہ اختیار نہ کیا۔بلکہ زمیندارنہ شغل اختیار کیا۔

شندرناتھ جیت ایک بہت بڑے سیٹھ موہن داس کے منچلے فرزند تھے۔جو اینٹوں کے بھٹے میں اپنے پتا (والد)جی کے ساتھ شریک رہے۔“اشور داس پنڈت چھوٹے موٹے بک سیلر تھے۔“

ان سب کا مختصر نمونہ کلام حسب ذیل ہے تیح بھان اثر کا رنگ دیکھئے